Hadisə

Bakıda piyada keçidində ağır qəza - Qadın nəvəsi ilə öldü

Masya
Masya
  • 29 Sep 2018
  • 40 baxış

Sabunçu rayonu, Şəhər şosesi küçəsində 2 nəfərin ölümünə səbəb olan yol-nəqliyyat hadisəsi baş verib.

XalqTv.com  Baş Polis İdarəsi və şəhər prokurorluğunun yaydığı birgə məlumata istinadən xəbər verir ki, Bakı şəhər sakini 1956-cı il təvəllüdlü İmanov Tərlan Cəmil oğlu idarə etdiyi “ZİL-130” markalı, 10-GL-195 dövlət nömrə nişanlı avtomobillə piyada keçidində 1952-ci il təvəllüdlü Gülü Salmanovanı, habelə onun nəvələri 2008-ci il təvəllüdlü Əfqan Məmmədov və 2009-cu il təvəllüdlü Aygün Məmmədovanı vurub.

Hadisə nəticəsində zərərçəkmişlər 3 saylı Şəhər Klinik Xəstəxanasına yerləşdirilsələr də, G.Salmanova və A.Məmmədova aldığı xəsarətlərdən xəstəxanada vəfat ediblər.

Fakta görə rayon Polis İdarəsinin İstintaq Şöbəsində Cinayət Məcəlləsinin 263.3-cü (yol hərəkəti və nəqliyyat vasitələrinin istismarı qaydalarını pozma ehtiyatsızlıqdan iki və daha çox şəxsin ölümünə səbəb olduqda) maddəsi ilə cinayət işi başlanıb.

Yük avtomobilinin sürücüsü Tərlan İmanov şübhəli şəxs qismində tutularaq istintaqa cəlb edilib.

İş üzrə müvafiq ekspertizalar, o cümlədən məhkəmə-tibbi və məhkəmə yol-nəqliyyat hadisələri ekspertizaları təyin edilib, şahidlərin və sürücünün ifadəsi alınıb və digər zəruri istintaq hərəkətləri yerinə yetirilib.

Hazırda cinayət işi üzrə istintaq tədbirləri davam etdirilir.

RƏYLƏR
ÖNƏRİLƏN XƏBƏRLƏR