Uğursuz yubiley

AVRO-2020-nin final mərhələsinə vəsiqə verən Millətlər Liqasına hazırlıq məqsədilə Qazaxıstanla yoldaşlıq oyunu keçirən Azərbaycan millisi bu rəqiblə 10-cu dəfə üz-üzə gəlib.

XalqTV.com  apasport.az-a istinadən xəbər verir ki, bu gün Astanada keçirilən və meydan sahiblərinin 3:0 hesablı qələbəsi ilə başa çatan görüşədək komandalar 9 dəfə münasibətlərini ayırd etmişdilər.

İlk belə görüş 25 il öncə baş tutub. İranda keçirilən beynəlxalq turnirə gənclərdən ibarət komanda ilə qatılan Qazaxıstan yığması millimizlə məhsuldar heç-heçə edib. Həmin qarşılaşma yığmamızın indiki baş məşqçisi Qurban Qurbanov üçün əlamətdar oyundu. Belə ki, komandamızın tarixinə ən yaxşı bombardir kimi düşən sabiq hücumçu 23 yaşında qol hesabını açıb. O, Tehrandakı matçda yığmada həm ilk qolunu vurub, həm də ilk dubluna imza atıb.

Heç-heçəylə başlayan duellər "sülh"sevərliyi ilə diqqət çəkir. 9 matçda 4 bərabərlik qeydə alınıb. İki dəfə qalib gələn Azərbaycan millisi meydanı 3 dəfə məğlub tərk edib.

10-cu yubiley matçında fərq bir az da artıb. Komandamız top fərqində də rəqibdən geri qalır - 10:14.

Arxada qalan 10 matçdan 4-ü seçmə xarakteri daşıyıb. AVRO-2008-ə gedən yolda iki heç-heçə edən komandalar (1:1, 1:1), AVRO-2012 yolunda hərəyə 1 qələbə qazanıb. Yığmamız 2:1, qazaxıstanlılar 3:2 hesabına seviniblər.

İki dəfə Türkiyə, bir dəfə İranda qarşılaşan rəqiblər 5-ci dəfə Qazaxıstanda görüşüb. Bu ölkənin üç müxtəlif şəhərində baş tutan matçlarda meydan sahibləri 3 qələbə qazanıb, 1 heç-heçə edib və 1 dəfə uduzub. Rəqibimizin evdəki 9 qoluna millimiz 5 dəfə cavab verib.

İki komanda arasında bir duel Astanada keçirilib. Həmin görüşdə meydan sahibləri 2:1 hesabı ilə qələbə əldə edib.

Bu vaxta qədər baş tutan heç bir oyunda 3 top fərqli qələbə olmamışdı.

Qeyd edək ki, Azərbaycan yığmasının tarixi ərzində ən çox qarşılaşdığı rəqiblər 10 dəfə üz-üzə gəldiyi Özbəkistanla Moldovadı. Astanadakı görüşdə Qazaxıstan da rekordçu rəqiblərə şərik çıxıb.

Azərbaycan - Qazaxıstan: Bütün oyunlar

8 iyun 1993. Tehran (İran). BT. Azərbaycan - Qazaxıstan (U-21) - 3:3

28 aprel 2004. Almatı. YO. Qazaxıstan - Azərbaycan - 2:3
6 sentyabr 2006. Bakı. AÇ. Azərbaycan - Qazaxıstan - 1:1
9 mart 2007. Şımkənd. BT. Qazaxıstan - Azərbaycan - 1:0
6 iyun 2007. Almatı. AÇ. Qazaxıstan - Azərbaycan - 1:1
3 fevral 2008. Antalya (Türkiyə). YO. Azərbaycan - Qazaxıstan - 0:0
3 iyun 2011. Astana. AÇ. Qazaxıstan - Azərbaycan - 2:1

6 sentyabr 2011. Bakı. AÇ. Azərbaycan - Qazaxıstan - 3:2

26 mart 2016. Antalya (Türkiyə). YO. Azərbaycan - Qazaxıstan - 0:1

5 iyun 2018. Astana. YO. Qazaxıstan - Azərbaycan - 3:0.

XalqTV.com